【龔成問答信箱】（Q44301-Q44320）

Q44301：

阿Sir, 我係你2022年學生。當時openAI仲未普及，Nvidia 未爆升。我記得頭兩堂，你用選股大富翁，教我地選定自己了解同有興趣既行業去研究。

於是我選定我本業藥劑, 同埋我興趣半導體呢兩個板塊去投資。

用咗你嘅技巧，選定咗龍頭同埋有護城河嘅Nvidia & AMD; Abbvie , LiLy 同1177 ; 幾年間冇理會佢哋，已經成功將當時嘅本金翻了倍, 令到我可以有資金做首期換樓！

我亦都冇晚晚睇住個股市，只係每半年review 一次。原來真正研究過一隻股票去買個感覺係咁踏實，多謝你。

我仍然有問題想問，其實我上堂已經問過。到底幾時應該放呢啲優質股？有啲人會話升一倍放一半，但如果係咁嘅話以nvidia 為例就會賺少咗好多錢。佢最後升咗唔止10倍。

雖然我明白優質股票如果質素冇下降就應該持有，但係美股而家已經非常熾熱，科技已經炒高咗好多，係咪應該放返部份錢出嚟再投資其他潛力股或者低迷嘅美債？

如果真係想減啲套現，有冇話個比例點樣係最好？

Thank you !

龔成老師︰

好高興，聽到你有咁好成績！

但記住投資長線要做得好，一定要保持學習，學習投資知識、學習不同行業知識等。因為世界不停在變，我地都要因應情況，去調整投資策略和目標。

我首先講大方向，我地最重要睇「企業」，而不是「股價」，所以，如企業質素高、發展力強，我地會一直持有，這是大方向，因為你要思考，如果賣出後得到現金，能否將現金買入另一企業，好過原有股票？

當然，有時股市過熱、貴，都有機會賣出，但由於都擔心賣出後，有機會買唔翻，所以，有時會用平衡策略，就時減部分，留部分。

現時美股的確係唔平，但又未到話好貴。而你持有的股票，都係有潛力，相信仲會有發展。

如果你貨多，我建議你先沽部份，目的係收回成本。之後，餘下股份就長線持有，咁會比較穏當。

再問：

知道！我會繼續學習，多謝你。9988 ，700，港交所，我都一直平均買入，持有。當年港股低迷變相買左好多平既股份。而家佢哋都升返好多，因為要用錢做首期，所以都沽咗一部分。但都唔敢賣哂，怕買唔返，同埋唔想短炒要成日睇住個股市。

真係好慶幸自己疫情時，有用時間睇你嘅書同上你嘅堂，先可以把握呢個機遇。 Thank you !!

龔成老師：

如果有需要買樓，都要減部分貨，最重部分在手，始終優質股賣出後，有機會唔翻。

現時成績，是你努力的成果！加油！
繼續做好理財！

------------------------------------------------

Q44302：

龔成老師你好，之前看到你叫我們整理一下股票的現倉，我整理了如下2圖，資料包括股票代號/買入總額/於9月份的現值 (息率）。

本人45歲，先居的物業已供好及有一百萬定期。

組合內有2個虧損最大的股票分別是 #17 及 #52, 各損失十萬元有多，想請問現在應該待上升點便賣出或繼續持有收息？

另外本人的股票組合有沒有什麼需要調整？謝謝老師

龔成老師︰

首先，你要明白一個概念，我地持有一隻股票與否，關鍵位是企業質素、前景，不要被買入價影響。

因為買入價已經係一個沉沒成本，你唔可當佢係一個神聖價位，因為已經無參考價值。未來持有與否，係應該睇翻企業本身。

如果企業質素轉差，就要賣出。如果企業某些核心優勢減少左，就有機會減持，因此，我地要分析企業的核心因素，一些長期的賺錢能力，有無改變。

你可以睇下以下影片，會對你有幫助︰
https://www.youtube.com/watch?v=5yu9jrvfGX4

你手上持有股票，大部份都有長線投資價值，但有幾個較大問題，你要注意︰

1) 你現時組合中持股數量太多，長線我建議集中係10-15隻左右，否則你好難定期審視佢地架質素變化，有機會造成不必要風險。

不過，我意思唔係叫你減持(因為你手上股票都有長線投資價值)，只是長線"集中"係10-15隻度就可以。

2) 你現時組合明顯偏重晒係港股，建議你未來加入一些美股(但美股現價唔平，可以慢慢做)，令整個組合變得更平衡。

但要留意，個別地區不建議超過組合的7成，如果不懂選股的話，可以考慮加入(VOO)，作用類似盈富（2800）。

Vanguard S&P 500 ETF（VOO）就是追蹤美股的ETF，追蹤指數是標普500指數，當中都是全球有實力的公司，有長線投資價值。

由於美股波動，不建議一次過大手買入，最好的方法慢慢分注，或以類似月供模式進行，長線持有，這是一個最好的投資策略。

以下是介紹VOO影片，有需要可以睇翻︰
https://www.youtube.com/watch?v=RnYZQlSG8qA

3) 我地投資唔係盲目去入市，而係要因應自己年紀和能力，去做個平衡配置。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你45歲，應以增值為主，建議你用「平穏增長股」作主力 + 「潛力股」作輔助，去創造一個增值平台。

0002、0005、0435、0778、0939這類收息股，增長力不明顯，持有是可以，你45歲，這類股佔組合就不用太過多，部分是可以的。

4) 另外，有部份股票質素較弱或者風險高(1988,3800,0017,0052,0823)，長線不宜持有太多。

另外，0845(己停牌)，多年出現虧損，有機會就沽出。

5) 以下是一些具質素的平穏增長股，你可以參考下，將你手上部份資金，慢慢配置落去︰

平穩增值股，指數基金由於是一個組合，因此在平衡風險方面較好，例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800）。

另外再加其他個股：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、港交所（0388）、長建（1038）等，你可以了解下，並從中選股。

6) 最後，緊記要提升自己投資知識。因為長線投資回報，係必然同你架知識水平成正比。

我建議你要多讀投資相關書本、年報，新聞和報讀相關課程。書本上，你可以睇我寫架《圖解股票小百科》、《圖解美股小百科》、《80後千萬富翁》和《財務自由行》，都適合初學者。

我Youtube Channel都會不時分享一些投資技巧和知識，你都可以睇下。
(當中不少影片，係用來幫讀者提升投資和財務知識，所以無時間性，幾年後再睇依然有用。如果你係想提升自己投資知識，建議你抽時間，睇翻舊影片去為自己增值。)
https://www.youtube.com/@%E9%BE%94%E6%88%90%E8%80%81%E5%B8%AB%E8%87%B4%E5%AF%8C%E5%B9%B3%E5%8F%B0

另外，本人的【投資倍升股課程】適合初學者的，課程可以更直接幫你提升"選股 + 估值"等最核心的投資知識。每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。

※※【投資倍升股課程】(基礎班)(共24小時) ※※
馬上報名：https://www.80shing.com/register.php?id=1
課程查詢：WhatsApp: 5545 7212

※※【環球美股實戰班】(共24小時)※※
馬上報名：https://www.80shing.com/register.php?id=6
課程查詢 whatsapp:5545 7212

------------------------------------------------

Q44303：

龔成老師你好

823領展我本來好喜歡，因為眼見我附近的商埸黃大仙中心，過去多年絕對沒有空置，而他海外的商埸又快速增長。但查一下他所發的期權，好像將來股票會增加了許多，而過去的主席，拿了驚人的懂士金。

第二隻
9909寶龍商業，其現金是現在的市值以倍計。股價在低位橫行，我相信，其老闆不可能因為想救一個認為無得救生癌大兒子1238寶龍地產而弄死埋一隻金蛋，就算不是金蛋亦是可以獨立發展的唯一希望的第二個仔。最近有消息說持有6成寶龍商業的寶龍地產子公司寶龍唯京，在11月被推上法院要求清盤，若清盤，他所持有的寶龍商業可能被還給債權人，但我相信影響寶龍商業有限，請龔成老師分析一下吓，謝謝

領展
己發行股票
2582396465
加
以股代息新發行
4953213
=2587349678
加
庫存單位17336700
=2604686378

有3300000000期權換股價為58.77元

你怎樣看領展？

謝謝

龔成老師︰

領展（0823）雖然增長力比過往年代略減，但整體仍是有質素，是收息及平穩增長型的房託。

不過，香港人的消費模式改變，都會對佢有點影響，例如網購及北上消費。

至於領展核心持有的商場物業，地點都不差的，長遠租金就算增長不及過往年代，也不會太過差。

另外，佢近年不斷收購海外，以及國內業務，以強化物業組合，領展其中一個特色，就是尋找一些有潛力的物業，收購後進行翻身，提高租金及物業估值，雖然這動作會提高風險度，但同時反映，佢不是完全無發展力的。

現價合理區較下部，可分注投資，長線持有，當然，都要控制注碼。

我之前出左跟進分析影片，可以睇翻︰
https://www.youtube.com/watch?v=kUU1jbE0H3k

 

寶龍商業（9909）不是無質素。

佢由寶龍地產（1238）分拆上市，並主要於中國提供有關物業管理服務。

寶龍商業業務尚可，母公司都有規模，不過，不是最大型的規模類別，所以在長遠的增長力方向，未算好強。

整體都有投資價值，但暫時會受內房問題所影響，中短期較弱，但長線相信會慢慢轉好。

------------------------------------------------

Q44304：

龔sir:你好，我有問題想請教你。
FCC宣布撤銷香港電訊（6823）在美國電訊授權，我已經持有6823好幾年作為收息。你認為今次事件對6823有冇影響？

需唔需要減持甚至賣出股票？
唔該晒????

龔成老師：

雖然都有影響，但未到核心性。始終香港電訊的業務，都是集中在香港，所以對佢業務，其實無太大影響，不用賣

香港電訊（6823）長遠有質素，是不差的收息股。

佢是香港的固網、流動通訊及寬頻服務的綜合服務供應商，提供本地電話服務、本地數據及寬頻服務、國際電訊服務、流動通訊及其他服務。佢亦透過中盈合資公司，向中國的電訊營運商提供網絡整合及相關服務。

綜合來說，可以用「業務穩定」去形容這企業，整體的業績不差，但又沒有特別驚喜，整體業務穩定。

另外，佢用全派息的政策，即是賺幾多派幾多，所以派息比率會高。只要佢之後保持賺錢能力，派息就能保持。這股可長線的。

------------------------------------------------

Q44305：

龔Sir，這幾隻核能股最近有不少升幅，聽講和內地研究核聚變有關，請問你點睇核聚變的技術和相關核能股？邊隻會較有值博率？

龔成老師︰

其實內地研究左好耐，一直有進步，但未有好明顯可以市場化的突破，故存在一定不確定性。

中國核能科技（0611）主要從事融資業務；太陽能發電業務；光伏電站的設計及諮詢服務，以及工程、採購及建設業務。

睇翻佢的業務情況，生意都算有，但增長力不強，加上企業規模細，唔算有獨特性，技術不強，投資價值不高。

唯一的賣點就是平，因為現時估值低，但我一向對貪平都唔太建議。

中核國際(2302)是中國唯一建立了完整的核科技工業體系的國有獨資企業，是中國核電站的主要投資方和業主，是核電設計、核燃料和核技術設備供貨商。

業務是有，但企業和收益規模不算高，投資價值唔算好大。

現價合理，最多只宜小注。

中廣核礦業（1164）主要從事天然鈾貿易、物業投資及其他投資。

企業質素屬中等，規模不大，盈利波動。

但業務不是無增長，但盈利不穏，近期出現虧損。現價已經係貴，投資值博率未算好高。

------------------------------------------------

Q44306：

你好，本人六月購入工商6.1及九月農行5.3共值一百三十萬左右，截至今日大概虧損約6%，眼見科技股近期當炒，想轉投這些當中，暫時心水中芯，巴巴及小米，不知如何選擇，該如何部署？謝謝老師

龔成老師︰

你提到的5隻股票，都有長線投資價值。

但你先要因應自己年紀和取態，去做個長線規劃。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和風險承受能力，去做決定。

假設你係年青至中年人士，你可以用「平穏增長股」 + 「潛力股」的組合。

9988, 1810, 0981是「潛力股」類，但現價唔平，只宜小注。

而1398, 1288是「收息股」，適合將或已退休人士。收息股係用來收息，支援退休生活，而唔係用來增值。

你可以因應自己情況，你再思考如何配置。

------------------------------------------------

Q44307：

幾時有澳門班？

龔成老師：

相信在2026年，會在澳門舉辦基礎班！

你或者可以預早留位，whatsapp 852-55457212，打「留位澳門班」就得。我地有具體資料就會 whatsapp，你可到時先決定報唔報，無所謂。

------------------------------------------------

Q44308：

請問銀的實物在哪裡可以買？????

龔成老師：

黃金實貨在金鋪、或銀行（中銀恆生都有，要問）。白銀實貨在上環有些店都有，你可上網找找。

------------------------------------------------

Q44309：

請問係網上邊到，可以留意住黃金的價格？

龔成老師

其實唔建議睇短期價格，久唔久睇財經新聞見到價格已夠。

或者你上銀行網都得：https://www.hangseng.com/....../banking/rates/gold-prices/

------------------------------------------------

Q44310：

龔Sir, 請問 股票 815 中國白銀集團，有無投資價值？

龔成老師：

中國白銀集團（0815）質素只是一般般。

集團主要於中國從事製造及銷售白銀及其他有色金屬；黃金、白銀及珠寶產品的零售及批發；提供白銀交易的電子平台、相關服務及銀錠貿易。

過往無論白銀升跌，但賺錢能力都不算強，就算近年銀價從低位上翻不少，都未見佢明顯賺錢，企業質素只是一般般，不太建議。

如果你睇好銀價，如如直接買白銀。

------------------------------------------------

Q44311：

老師，我已報名讀基礎班。 ????

老師，請問買白銀，除買實物/買金融相關產品，可否有建議？ 金融產品有什麼推介？

龔成老師：

好，遲D股票班見！

白銀，可以投資相關ETF，或去銀行開個紙黃金戶口，一般都有得投資紙白銀的。

iShares Silver Trust（SLV）是一隻追蹤白銀價值的ETF。佢應該是規模最大的白銀ETF，創立于2005年。

佢是跟踪白銀價格的，即是白銀向上佢價格向上，白銀跌佢就跌，而費用率約0.50%。長線投資價值都有的。

------------------------------------------------

Q44312：

你課程係咪適合初學者
唔太識點投資股票？

龔成老師：

股票班（基礎班）適合初學者的，因為整個課程的設計都是針對初中階投資者的，課堂頭3堂都是初階的內容，只要你課後好好溫習，能跟到之後的內容。

每一課有兩份筆記比你，並有指引，要你在一星期內找那些資料，溫那些內容，做功課等。

每一堂更有一個附加的網上影片，是大約30分鐘的重點重溫片，可比你在家溫習。另外，每一堂都有簡單功課要你做，並有附加影片解說答案。

只要你跟著去完成，就能掌握整個課程所學。到你讀完後，你能自己選股、投資時機、配置、評估平貴，在投資上已掌握了一定的知識。

------------------------------------------------

Q44313：

請問龔sir..將來冇下一代仲建議做各項投資嘛？如果係投資呢方面冇咩天賦學唔到????現金流唔多..有冇啲咩類型嘅投資可以相對風險穩定操作簡單啲？

例如咩金幣銀幣..熊貓幣..平時有儲開郵票..但呢啲咁靚又唔捨得賣..唔賣嘅話就冇辦法換成現金????以後自己一個啲嘢又係唔知益邊個????

頭到來自己又享受唔到????主要目的係想為生活增加多啲現金開支

龔成老師：

其實學投資，比你想象簡單，但要學，就算我的股票入門班，同學由最零去學都學得識，學完都識得自己做配置。

第一，你要做好理財，例如增加儲蓄。

第二，考慮自己年齡、風險度，投資各種工具（要了解先好投資）。

你要建立一個平衡的，貴金屬只是一少部分，你仍要投資其他工具，基金、股票、債券等。

如果你想有現金流，就應該投資一些有息收，風險不高的工具。收息股都得。

其實，你這刻最重要是增加知識。

------------------------------------------------

Q44314：

Sir, 成長股ETF-Vanguard(美股:VUG) 可否像VOO, QQQ一樣，每月投資，長期持有呢？

龔成老師：

可以的。Vanguard成長股指數（VUG）是一支採被動式(或稱指數型)的管理方式，以追求CRSP US Large Cap Growth Index的績效表現為投資目標。

這基金是一支採被動式(或稱指數型)的管理方式，以追求CRSP US Large Cap Growth Index的績效表現為投資目標。

CRSP US Large Cap Growth Index廣泛的包含了在美國具領導地位的大型成長股。

本基金所投資的標的和標的間的權重都以標的指數為主。因此績效表現和風險特性都會與該指數非常相似。

這基金都有投資價值，可以長期分注投資，只要不要一次過大手就得，始終美股整體現水平唔便宜。

------------------------------------------------

Q44315：

請問9992看好嗎 , 適合長線嗎 謝謝

龔成老師：

泡泡瑪特（9992）有質素，企業是一家覆蓋潮流玩具全產業鏈的一體化平台，當中包括藝術家發掘、IP運營、消費者觸達及潮流玩具文化的推廣。

佢算是中國最大且增長最快的潮流玩具公司。合作伙伴中不乏知名品牌，好似迪士尼、HELLO KITTY等等。而產品中，最為人所認識就是"盲盒"，此銷售模式為集團貢獻不少。

不過，佢過往曾經面對中國策方面的風險，這都是潛在風險。

有一點要留意，業務始終是潮流產品類，如果日後熱潮減少，都會對佢的生意有一定影響！

因此，如果這流潮一直能維持，這刻算是合理區較上部，相反，如果這潮流過一段時間後轉弱，這刻就變成明顯貴，到時股價都會大跌，你要明白這風險。因此，如果你睇好，都只建議小注投資好了。

------------------------------------------------

Q44316：

龔sir我將全部身家買了小米和3067等我孖囡大學拿出了????????

龔成老師：

這兩隻都是可長線投資的，不過，你這樣會太過集中在中國科技股，建議將部分轉到其他類別，甚至美股VOO，這樣對你來說會較平衡，有增加之餘，風險度又能減少。

------------------------------------------------

Q44317：

點睇鉑金？

龔成老師：

鉑金的投資價值在於其稀有性、工業應用需求，以及作為一種具有抗通膨潛力的貴金屬，但投資時也需注意其價格波動、工業需求變化和市場流動性較低的風險。如果從長期來說，我見有些機構預計市場會出現短缺，可能支撐鉑金價格上漲。 

------------------------------------------------

Q44318：

老師今日9988 $172.6
我已持有1810、388、939，6955、9626

今日想入1810、9988、1024，只有阿里入到預設價位
$172.6
9988

你覺得阿里是否正面

龔成老師︰

你上述股票都可以持有。

但6955, 9626, 1024風險較大，長線不宜持有太多。

而你組合太多潛力股(除了0388,0939不是)，長線應以平穏增長股作主力。

阿里（9988）係業務層面，有不少優勢，部分業務處有規模，也處領先位置，加上人工智能等技術不斷進步，都利好整體企業長遠發展。

數年前因監管因素，令企業增長慢左，加上近年競爭大左，影響佢賺錢能力。到近年，業務持續好轉。企業長遠仍有增長力，有發展延伸業務，都會成為企業增長點。

以企業的長期發展計，這股有質素，有長線投資的價值。

這企業不少技術都不差，再加上人工智能技術，會有利好企業長遠展，因此，長遠正面。

現時合理區中上部，分注投資可以，買入後可長線，但短期有機會較波動。

平穩增值股︰
指數基金由於是一個組合，因此在平衡風險方面較好，例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800）。

另外再加其他個股：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、港交所（0388）、長建（1038）等，你可以了解下，並從中選股。

------------------------------------------------

Q44319：

感謝龔sir，我都係諗住長揸，但見到股價咁就會猶豫，同驚佢本質已變

龔成老師︰

中短期股價下跌，唔一定係代表佢質素出問題。

我地持有一隻股票與否，關鍵位是企業質素、前景，不要被買入價影響。

因為買入價已經係一個沉沒成本，你唔可當佢係一個神聖價位，因為已經無參考價值。未來持有與否，係應該睇翻企業本身。

如果企業質素轉差，就要賣出。如果企業某些核心優勢減少左，就有機會減持，因此，我地要分析企業的核心因素，一些長期的賺錢能力，有無改變。

你可以睇下以下影片，會對你有幫助︰
https://www.youtube.com/watch?v=5yu9jrvfGX4

所以，你買入一隻股票時，一定要理解清楚佢業務和質素在那裡，否則好易做錯投資決定。

------------------------------------------------

Q44320：

005，2388，941，1299，內銀，內險，可以按兵不動嗎？如果下跌30%可以加注買入嗎？

龔成老師：

只要你持貨不過多，可以繼續持有，如果跌3成當然可加，但相信好難跌咁多。另外，見你組合，較多銀行、保險，你長遠宜調整翻，建立一個更平衡的組合。

----------------------------------------------

若你有問題想向本人發問，可在龔成的fb專頁「www.facebook.com/80shing」inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，所有個案及意見，只是供大家參考，只是教學分享，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。