【龔成問答信箱】（Q45761-Q45780）
Q45761：
現時算「全民皆股」階段嗎？
很多股票都創新高，包括公用股港燈，銀行股滙豐等。
最有效計劃資產的方案是將大資金保留，等待機會入市，或是繼續購入收息股如ETF比較合理？
龔成老師︰
其實好多股票升到近年高位，但部份係有業績支持，所以未到貴，仲係可入市水平。
至於長線買邊類股票，你可以因應翻自己年紀，去進行配置，港股大致處於合理區，美股就唔平(只宜小小注)。
而"全民皆股"，尚未到。
當你見到身邊好多人，開始討論股票(包括平時好少投資、甚至未投資過架朋友，都開始講)。
仲要話自己賺左幾多幾多，咁就開始危險。
------------------------------------------------
Q45762：
你好，想請教有什麼高息投資產品或股票，又穩定的？謝
龔成老師︰
其實點解一隻收息股高息，係因為佢風險比一般收息股高，所以穏定性較弱。
所以，要"高息 + 高穏定性"係存在根本性架矛盾。
以你43歲年紀，持有高息股係可以。但長線增值效果，一般會比增長型優質股弱，所以偏向建議你集中具增長力股票，長線會對你較有利。
以下是一些值得考慮的收息股，你都可以參考下︰
同埋，下星期二晚8:30，我會係Youtube出最新"高息股分享"影片，你都可以留意。
目標是5%以上股息率的收息股，例如高息基金（3110）、港燈（2638）、深高速（0548）、香港電訊（6823）、工行（1398）、置富（0778）等都可以，你可以了解下，並從中選股。由於收息股股價都會有上落，因此要控制每一隻佔股票組合的比例，不能超15%，最好在10%以下，而3110由於是一個組合，比例可比個股高。
另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、偉易達（0303）（記住，股價略波動，不能太過大注）。
[各類收息股比較] https://www.youtube.com/watch?v=t1VSoLLtpic
[避開"假"收息股方法] https://www.youtube.com/watch?v=3bf4bhV-f-g
------------------------------------------------
Q45763：
謝謝老師，我現在40歲，有穩定工作收入，可能工作多10年，這股票應佔我的股票組合多少百分比？
之前在2019年左右聽老師說買入了一些比亞迪，現在有不錯的升值。希望能借助投資潛力股提早財務自由。
龔成老師︰
記住，潛力股係高風險，唔好集中晒係佢地度，以你年紀最多佔一半好了。
至於組合平衡性︰
任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。
因此，你要建立一個平衡的投資組合，當中有不同的類別、不同的行業，這是最好的平衡風險方法。個別地區不要高於組合70%，相同行業不可佔組合多於30%，而單一企業不要高過15%。
但盈富(2800)、VOO這類指數基金，則不受企業和行業限制，因為它是一個包含一籃子不同行業的優質股組合。因此，盈富(2800)、VOO就算在組合中佔較大比重，都唔會造成(企業和行業)過度集中性風險。
以下影片都有講組合平衡的重要性和做法，你可以睇下︰
https://www.youtube.com/watch?v=Z9Yglj7eKvA
比亞迪(1211)雖然近幾年升唔少，但以現時條件計，尚在合理水平。
除非你持股佔組合太多，否則我偏向建議你保守，最多減少少，點都要有貨係手。
------------------------------------------------
Q45764：
龔sir你好，上年聽到你意見進行了月供股票，建立咗自己投資組合，想請你幫手睇睇現在組合會唔會有更好嘅分配或者建議？10分感謝
龔成老師︰
新年快樂，祝你新一年事事順利，身體健康。
投資組合方面，留意︰
1) 選股上，都有質素，但留意平衡性。
(我無仔細計)但見你手上潛力股都好多(1211,1810,AMC,NOK,NVDA,QQQ)，以你35歲計，若你有一定投資經驗﹐都最多只宜佔組合一半。
若你經驗一般，或者自問較保守，比例要進一步下調，長線以平穏增長股作主力，咁會較穏當。
2) AMC Entertainment Holdings（AMC）業務比較波動，長線不宜持有太多。
------------------------------------------------
Q45765：
Sir想問下如果自住首次置業，你會揀呎價平但樓價貴，定呎價貴但樓價平
龔成老師︰
你講架，唔係考量最重點。
自住物業的話，最重要係佢適合自己長期生活需要(講緊未來10-20年)。同埋長線有信心供得起，咁就可以。
好多人會將投資因素，放埋落自住物業度考慮。我唔會話錯，但其實未必有太大架必要。因為自住物業，就算佢升定跌，一般人都因為咁去輕易沽出佢架物業(除非你長線可能因為家庭需要，會打算再換樓，咁就另計)。
即係話，個物業價格變化，好多時只係影響緊你架心理，而非實質。
反而，你供款出問題，就真係有機會影響你持有物業架狀態。或者佢已經唔適合你居住，先至有機會去進行換樓。所以，"生活需要"同"供款能力"，永遠先係自住樓優先考慮重點。
------------------------------------------------
Q45766：
你好，想請教下 一直儲錢等機會下買股，當中既時間可能以年計，那這些錢可以做什麼呢？ 只放在這就不能錢生錢。但定期下 又會綁住啲時間，驚錯失機會。 謝謝
龔成老師︰
其實我自己等機會架錢，會係現金持有。
如果唔想只係白放，最多都係部份做短期定期，主要係留在一些高流動性，同時不易出現貶值的地方。
不過，我地唔會將所有資金白等，會按當時平貴度，去分段進行配置。以現時市況，現金比例大約佔2-3成好了。
我明好多人會想等到平，先一次過入。但無人知幾時會平，唔一定在下一之大升市前，一定會回到平宜區。
所以，我地唔會全部資金只等，而係按市況平貴，去分段入，去平衡錯失機會架風險。合理區，都可以分注買貨。
------------------------------------------------
Q45767：
你好，龔成老師
我今年終於可以實行月供股票，想請教應該選擇邊一個會比較好，我預期係長線超過10年月供。
1）美股 VOO
2) 美股 NVDA
3）港股 比亞迪
或者第4）AVGO
龔成老師︰
我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。
因此，你在選擇應該投資那一類股票時，會係因應你人生階段、投資經驗和風險承受能力，去做決定。
假設你係年青至中年人士，你可以先留意「平穏增長股」 + 「潛力股」的組合。如果你係偏年青，比例大約可以去到各一半。
但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。
現在你每月先用5成儲蓄做月供。其餘先儲起，用一邊月供一邊儲蓄的策略。
月供方面，你可以參考一些平穩增值股，指數基金由於是一個組合，因此在平衡風險方面較好，例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800）。
另外再加其他個股：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、港交所（0388）、長建（1038）等，你可以自己了解下，再決定是否從中選股。
如果想增長力高少少，可留意下潛力股，例如指數基金，美股可投資納指基金（QQQ），或在港上市追納指基金（2834）、港股則可考慮安碩恒生科技（3067）。另外再加：美股如微軟（MSFT）、ASML Holding（ASML）、Tesla（TSLA）、Amazon（AMZN）、港股如騰訊（0700）、比亞迪（1211）、小米（1810）等，你可以了解下，再決定是否從中選股。同埋，佢地波動性和風險會較高，要自己平衡。
但潛力股風險較高，對投資知識要求較嚴格，所以你可以先集中在平穏增長股上，甚至先集中供盈富(2800)和VOO這類指數ETF。到你投資知識有所提升後，才慢慢加入潛力股到組合之中。
至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。
你提到架NVDA和AVGO都可以月供，佢地係潛力股類，緊記月供時不要佔比太多。
最後，你要明白上述月供方法雖然能幫助初學者在知識不多情況下，進行有限度的財富增值。但如果你想財富增值能力進一步提升，就必需加強投資知識，提升選股分析和估值能力。令你可以做到因應市況平貴，自行制定入市策略。
因此，我建議你要多讀投資相關書本、年報，新聞和報讀相關課程。書本上，你可以睇我寫架《圖解股票小百科》、《圖解美股小百科》、《80後千萬富翁》和《財務自由行》，都適合初學者。
我Youtube Channel都會不時分享一些投資技巧和知識，你都可以睇下。
(當中不少影片，係用來幫讀者提升投資和財務知識，所以無時間性，幾年後再睇依然有用。如果你係想提升自己投資知識，建議你抽時間，睇翻舊影片去為自己增值。)
https://www.youtube.com/@%E9%BE%94%E6%88%90%E8%80%81%E5%B8%AB%E8%87%B4%E5%AF%8C%E5%B9%B3%E5%8F%B0
另外，本人的【投資倍升股課程】適合初學者的，課程可以更直接幫你提升"選股 + 估值"等最核心的投資知識。每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。
※※【投資倍升股課程】(基礎班)(共24小時) ※※
馬上報名：https://www.80shing.com/register.php?id=1
課程查詢：WhatsApp: 5545 7212
※※【環球美股實戰班】(共24小時)※※
馬上報名：https://www.80shing.com/register.php?id=6
課程查詢 whatsapp:5545 7212
------------------------------------------------
Q45768：
老師，因為我抽到白居二，所以今年如果有機會就會上車，正考慮賣出三分一出嫁時的金器, 還是賣出部分持有中的股票來套現一些現金...
因為金價和股票都在增長中...雖然我認為黃金的增速没有股票那麼快, 不過股票的風險較大
所以問問老師意見
龔成老師︰
從投資角度，考慮平貴度和組合平衡性。
邊樣貴，就優先沽佢先。
以及邊樣較多，都可以減部分。
如果有股票已經佔組合15%以上，都可以減持，去優化組合平衡性。
而黃金係用來對沖極端事件，所以佔財富組合2-5%就可以。
你可以睇下有無邊D股票或資產係唔平衡，咁就可以優先沽。
最後，由於係你"出嫁時的金器"，有投資以外價值。
所以，你唔一定要當佢係投資組合一部份去計。
當然，你有需要，減部分，是可以。
------------------------------------------------
Q45769：
龔sir 你好，請問 協鑫 （03800) 上年高位1.3買入 ，現算算公司情況改善，要賣出嗎？ 另外，01211 想請問你點睇，買入價114.483 ，謝謝
龔成老師︰
首先你要明白一個概念，我地持有一隻股票與否，關鍵位是企業質素、前景，不要被買入價影響。
因為買入價已經係一個沉沒成本，你唔可當佢係一個神聖價位，因為已經無參考價值。未來持有與否，係應該睇翻企業本身。
如果企業質素轉差，就要賣出。如果企業某些核心優勢減少左，就有機會減持，因此，我地要分析企業的核心因素，一些長期的賺錢能力，有無改變。
你可以睇下以下影片，會對你有幫助︰
https://www.youtube.com/watch?v=5yu9jrvfGX4
協鑫科技(3800)風險較高，過往業務不穩，較受外在環境、資源價格等因素影響，風險高。
這企業主要為光伏行業製造多晶硅及硅片；銷售電力；開發、投資、管理及營運光伏項目。
要留意，過往曾經有核數師請辭，反映企業質素及財務數據方面，會存有風險。
盈利的波動好大，這企業受多晶硅價格影響，而價格其實可以有好大變動，令投資這股都有風險。如果不能承受高險，不建議投資這股。
如果投資者明白風險，只建議小注投資。
若你3800持貨好少，可以守，再觀察。否則，就要減持部份，去平衡風險。
比亞迪（1211）相信短期仍會面對中國車市較一般的情況，短期股價有機會較波動，不過以長遠角度分析，其實近年企業業務發展理想，研發不斷進行，汽車賣得好好，電池技術發展得很好，出口部分理想，企業長遠發展正面。
現時已經成為中國電動車市場的一哥，同時品牌及銷售網絡理想，長遠仍有發展，不過，股價就有少少波動。
現價約在合理區中下，可以分注或月供投資，不過要控制好總投資金額，這股佔整個股票組合，最好在15%以下。
如果本身有貨，可長線，雖然企業最爆炸性增長已過，但長遠仍有發展，但就預佢股價波動，因此，只要持貨不過量，就可以長線持有。
------------------------------------------------
Q45770：
老師，請問以下股票邊幾隻較好?
3145, 3416, 316, 659, 1836, 1308, 551
龔成老師：
如果目標是收息，可優先考慮3145，再加659，3416則要控制注碼。
3145可投資，是不差收息基金
3416，高息，但運作特別，投資要控制注碼
316、1308有質素，但要留意股價波動，面對行業週期因素
659是不差收息股
1836，不過不失，投資要控制注碼
0551，不過不失，投資要控制注碼
------------------------------------------------
Q45771：
你好～我打算每月現金存$6000
另外月供0941，0005，2388，0945，1038各$1000，如果咁樣5年後有冇可能有100萬？thank you
龔成老師：
上述都是優質股，可月供，不過要記住，股票有升有跌的。
每月儲$6000現金，月供股票$5000，合共$11000，5年合共投入$66萬。
一般來說，有機會增值至$80萬-$100萬，因此，都有機會，但要睇市況，另外，當中有不少都是收息股，當你收到股息後，你要儲起或投資。
另外，如果想組合更加平衡，建議加入2800、VOO月供，這樣會較平衡。
------------------------------------------------
Q45772：
龔sir這幾隻長揸收息可以嗎????
1. 02380 - 中國電力國際發展有限公司
2. 00384 - 中國燃氣控股有限公司
3. 00371 - 北控水務集團有限公司
龔成老師：
方向上是可以，但由於佢地都會因業務情況，而影響派息，因此都要控制好注碼。
另外，每隻股都要留意股價會上落，例如中國電力（2380）業務不差的，近年有發展新能源，帶動業務增長。但新能源部分，始終變化會大少少，令企業股價有少少波動。
佢主要在中國開發、建設、擁有、經營及管理發電廠。過往業務都有增長，不過盈利有少少波動，主要受成本及定價因素影響。
近年有發展風能及太陽能業務，成果不差，帶動企業增長，現價合理中間，都有長期持有的價值。
------------------------------------------------
Q45773：
老師，以現價，增長及股息比較，港燈，中銀和中移動，那一隻較好？
龔成老師：
3隻都是有質素的股票，現價合理，都有長線投資價值，反而你自己的投資目標、風險承受度，是較大考慮因素，如果想收息就港燈，如果想收息及增長就941、2388。
幾隻的投資值博率都接近，如果長遠有息收及增長，可選中銀香港（2388）長遠仍有質素，是收息及平穩增長類的股票。
這股近年股價較弱，除了市場擔心香港影響影響業務與壞賬外，香港樓市回落令負資產增加，都會對這銀行有影響，因為中銀在香港的按揭市場業務有一定的市佔率，因此當樓市轉弱，市場都會擔心這方面出現不利風險。
不過，這企業長遠的質素不變，投資者在分析時，也應該著重企業的長期發展，而不是短期情況。
在中長期，經濟會慢慢好轉，樓市會穩定，因此，這企業仍會慢慢好轉的。
銀行業雖然無過往咁好賺，但整體的質素不差。此股適合較穩健型、長線型的投資者，無論是平穩增長還是收息，都是可取的，現價合理中間，分注投資，長線持有可以。
------------------------------------------------
Q45774：
呀Sir , 我用返你學我估值方式去計中移動A股(600941)，PE=14-16，EPS: 6.8，估值95-108。呢個數合理嗎？
龔成老師：
由於A股在估值上，同國際市場（美股、港股）不完全相同，所以，不是所有A股的適用。
因為A股有時著重前景、發展，而忽略實質企業價值，特別是高增長股。至於中移動A股(600941)，勉強都可以，但建議加多少少緩衝區，如10%以上，會較穩陣。至於你的數，都可以參考。
------------------------------------------------
Q45775：
老師我都想賺1千萬
龔成老師：
要一步步做好理財，先從最基本的提高收入、減少支出、訂立儲蓄目標做起。
同時，要學投資，合理增值（不是炒、不是賭，是長期合理增值）。每個人的情況不同，按自己的情況，訂立合理目標。
------------------------------------------------
Q45776：
老師，我而加36歲，先開始認真學股票投資，會吾會太遲
只有20萬儲蓄
學老師的課程趕得切嗎
龔成老師：
有心唔怕遲，你這刻開始做好理財，學投資，一定好過你10年後先學。
當然，你36歲，要加強儲蓄，因為$20萬以你年齡，有點少，你要想方法提高收入，減少支出，儲多些資金。
同時，要學好投資，記住，投資不是炒、不是賭博，是合理進行財富增值，要長線進行的，你這刻學仍是可以。
------------------------------------------------
Q45777：
啊sir，我請教一個問題喔，現在都是AI的時代，我覺得未來無論是各行各業都應該偏向於AI的發展，
請問一下如果想持有AI類別的潛力股，啊sir有什麼建議可以長線持有的？謝謝
龔成老師︰
其實AI有好多相關企業，分布係不同的範疇。不過，具體講係好複雜，因為唔同架企業，係AI架業務和應用程度都所不同。
[部份可考慮AI企業，不過留意近期佢地都升左唔少，只宜分注慢慢儲貨。]
上游設計晶片相關︰NVIDIA(NVDA)、AMD、博通(AVGO)
中游生產晶片相關︰ASML、台積電(TSM)、中芯(0981)
下游提供或受惠於AI應用︰META、Microsoft、Google、AMZN、PLTR、9988、1810、1211、9888。
你可以因應自己認知和想法，去到決定投資邊樣企業。
如果你無太多想法，純粹睇好AI發展，可以分注咁儲佢架ETF。但始終AI發展潛力係有，但不確定性都高，所以不能過於進取。
以下是AI概念股分析影片，你可以睇下︰
[硬件類] https://www.youtube.com/watch?v=t0BCLLyOfs4
[應用類] https://www.youtube.com/watch?v=P_K-5riMDjI
[部份AI相關ETF]
(i) 美股︰Global X Robotics & Artificial Intelligence ETF(BOTZ)主要投資於可能從機器人技術和人工智能 (AI)利用中受益的公司，包括那些涉及工業機器人和自動化、非工業機器人和自動駕駛汽車。
前十大持股包括NVIDIA(NVDA)、直覺外科(ISRG)、KEYENCE CORP(6861.JP)、ABB LTD(ABBN)等大型企業。
此股有一定投資價值，但不確定性高，市場對AI未來發展其實未有具體的想法，所以有少少係"估願景"。
另外，要留意多一點，就是此ETF前5大股票佔去整個組合4成半。所以，這5間公司表現，好直接影響到ETF的升跌。
總括而言，你投資係可以，但不宜過份進取。
(ii) 美股︰iShares未來人工智慧與科技ETF(ARTY)，基金是追蹤Morningstar Global Artificial Intelligence Select Index。
前十大持股包括NVIDIA、AVGO、META、AMD、Google等大型企業。
此股有一定投資價值，但不確定性高。投資係可以，建議用分注去慢慢儲貨，同時控制注碼。
(iii) 港股︰Global X 中國機械人及人工智能ETF(2807)，主要投資於對中國機械人及人工智能的發展和普及至關重要的公司。
當中包括主要業務為用於工業機械人和自動化的硬件及軟件開發、非工業機械人、自動駕駛汽車和人工智能產品之公司。
組合當中，以資訊科技為主，佔組合6成半。
前十持股包括百度、中際旭創、NARI Technology、海康威視等。
如果你睇好內地AI行業發展，同時又能承受風險，可以小注而隻ETF。不過留意，佢成交唔多，有機會買賣差價偏大，影響回報。
------------------------------------------------
Q45778：
老師，居屋/私樓，自住對比
龔成老師：
簡單比較，居屋自住方面較實用，但可能配套較部分私樓差，或者不及私樓豪華，當然，居屋好處是較平，同一個金額數目，可以住大一些，因此，這是好個人化的定。
至於投資價值方面，私樓始終較高。
------------------------------------------------
Q45779：
龔Sir 之前拜讀你有關優必選的分析文章，獲益良多，也讓我重拾信心繼續持有（去年3月買入後一路下跌，一度讓我感到心灰意冷）。現錄得可觀收益，十分感謝！
另一方面，我同期持有的越疆卻持續下跌、似乎仍未見底。明明之前調研時，公司條件和財報表現都不算差，有時間能否講下越疆？？
龔成老師：
第一，短期股價波動好正常，我地最重要是集中分析企業發展，不要錯左焦點。
第二，潛力股風險較高，你要明白這點。
越疆（2432）主要從事協作機器人的設計、開發、製造及商業化。業務有一定的發展力。集團的協作機器人可按軸數分為六軸協作機器人及四軸協作機器人兩類，配有可操作機械臂的標準機器人。集團的產品包括：
（１）ＣＲ系列：包括六軸協作機器人型號，面向尋求實施靈活生產系統的工業製造商，應用於汽車、消費電子、半導體、醫療、化工、零售等眾多行業。
（２）Ｎｏｖａ系列：以極致輕量化及用戶友好的六軸協作機器人產品為特色，提供２千克及５千克有效負載選擇，專為面向客戶的使用場景而設計，如咖啡店咖啡製作及拿鐵拉花、診所理療及自動售賣機現場飲品沖泡等。
（３）Ｍａｇｉｃｉａｎ系列：包括兩個型號的四軸協作機器人及一個型號的六軸協作機器人，專為教育機構設計，用於協助學生學習ＳＴＥＡＭ課程，如ＡＩ及編程、協作機器人應用培訓及科研培訓。
（４）Ｍ系列：包括兩個四軸協作機器人型號，專為輕工製造業客戶設計。
（５）複合機器人：整合移動底座及咖啡站等額外部件以及可執行精密工作的定制編程，應對各個行業中的特定使用場景，如碼垛、焊接、移動操作及職業培訓。
（６）配件：主要包括視覺傳感器、力傳感器及電動夾爪等模組化部件，可根據使用場景連接到ＣＲ系列、Ｎｏｖａ系列及Ｍａｇｉｃｉａｎ系列。
企業有一定的發展力，但這刻的具體生意未算得多，仍要時間發展，加上這刻仍在虧損階段，未能確定具體盈利時間。
這刻要進行估值十分難，因此，企業雖然有發展，但根本無法得知當前平貴度，市場只能從前景等因素去推算，但參考度並不高。如果睇好企業，也只建議小注投資，同時要明白股價會十分波動，高風險類。
------------------------------------------------
Q45780：
龔sir, 請問點樣可以做月供股票？ 謝謝你
龔成老師：
簡單來說，月供股票就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。
形式就是每月投入相同的金額，買入同一隻或多隻股票，並持續進行。
例如，每月以相同金額$10,000 買入股票A，假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。
總結這三個月，投入了的資金為$30,000，累積股票為1019股，平均買入價為$29.4。
由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。
要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3 年以上，之後持有5年以上。
月供最重要的一點，是「選股」，如果你無選股能力，就投資ETF。
----------------------------------------------
若你有問題想向本人發問，可在龔成的fb專頁「www.facebook.com/80shing」inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。
另外，所有個案及意見，只是供大家參考，只是教學分享，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。
由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。