【龔成問答信箱】（Q48381-Q48400）
【龔成問答信箱】（Q48381-Q48400）
Q48381：
隻7709有冇機會升返可以平手走呢
而家都輸左35%
年頭買左啲金銀兩倍做多
又係輸左幾十%唔捨得割肉
佔倉比例唔算好重5%左右
但都已經輸到唔想面對
想等佢地有冇可能升返多啲先
或者再溝貨等升返先再放
我自己都輸到冇晒心機
冇眼睇佢地
其實我都想抽到時間參加你課程
因為工作關係好難抽到時間
因為工作都好緊要我要有穩定收入去維持家庭日常開支
但冇諗到自己投資真係好糊塗
搞到輸左咁多錢
龔成老師︰
簡單4點︰你要認真睇、認真做，否則好難幫到你。
1) 唔好再用槓桿
手上有槓桿架，分多次沽出，換成正股。
海力士、黃金之類唔係無價值，但唔好做槓桿去買佢地。
你而家重點，唔係短期平手，而係思考清楚長線點做。
當方法正確，長線一定可以將損失追回來。但你唔肯放過眼前損失和錯誤，咁好難幫到你。
你睇翻過去7709用海力士正股表現，你就會見到，7709跌得多升得少，當中你的成本十分高。
2) 唔認識架股票，唔好買。
至少，你要講得出︰
‧佢做乜野生意
‧點賺錢
‧點解市場咁多同業，D客都只係鐘意買佢
等唔到自己，就唔好買。
如果最後發現，原來自己乜股票都唔識，咁就"分注慢慢入"指數ETF。
因為指數ETF係一籃子不同行業架組合，具分散風險能力。就算當中個別股票出問題，對成個ETF都唔會有嚴重影響。
例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800），都係指數ETF類別。這些ETF有質素，適合一般投資者選擇。
若你未有定平貴能力，可以用月供或者分注模式去儲貨，去平衡買貴貨風險。
如果想知多少少指數ETF係乜，可以睇翻我之前架Youtube影片︰
https://www.youtube.com/watch?v=nBr4tCJ__oY
3) 唔好溝貨，而個先係最致命。散戶輸到翻唔倒身，好多時就係因為"溝貨"。
我建議你睇翻以下Youtube影片，對你理解溝貨而件事(作用和風險)，對你未來投資會有好實際架幫助。
https://www.youtube.com/watch?v=5yu9jrvfGX4
4) 未上到堂，睇住書同YT先。
書本上，你可以睇我寫架《圖解股票小百科》、《圖解美股小百科》、《80後千萬富翁》和《財務自由行》，都適合初學者。
我Youtube Channel都會不時分享一些投資技巧和知識，你都可以睇下。
(當中不少影片，係用來幫讀者提升投資和財務知識，所以無時間性，幾年後再睇依然有用。如果你係想提升自己投資知識，建議你抽時間，睇翻舊影片去為自己增值。)
https://www.youtube.com/@%E9%BE%94%E6%88%90%E8%80%81%E5%B8%AB%E8%87%B4%E5%AF%8C%E5%B9%B3%E5%8F%B0
------------------------------------------------
Q48382：
老師，請問0823現價可入市嗎？
龔成老師：
領展（0823）雖然增長力比過往年代略減，但整體仍是有質素，是收息及平穩增長型的房託。
不過，香港人的消費模式改變，都會對佢有點影響，例如網購及北上消費。
至於領展核心持有的商場物業，地點都不差的，長遠租金就算增長不及過往年代，也不會太過差。
另外，佢近年不斷收購海外，以及國內業務，以強化物業組合，領展其中一個特色，就是尋找一些有潛力的物業，收購後進行翻身，提高租金及物業估值，雖然這動作會提高風險度，但同時反映，佢不是完全無發展力的。
增長力已不及過往年代，但收息及基本增長，仍可以。現價合理區較下部，可分注投資，長線持有，當然，都要控制注碼。
------------------------------------------------
Q48383：
阿sir您好，我依家睇緊notes，其中有一句我依家都仲係唔太明白，想向您請教一下：
“將流動資產減流動負債，若股價低於這價值，...”即係點計？點用？
謝謝阿sir幫忙解答
龔成老師：
假設流動資產$10億，流動負債$2億，當我地考慮企業的資產價值時，其中一個角度可考慮佢「流動性較強、變現能力較高的資產」。因此，將流動資產減去流動負債，就會得到$8億，反映這企業在流動性較強方面的資產價值有多少。
因為企業有好多資產，但不是每一項都值錢的，以這角度就可以計出一個較有代表性的數目。
下一步就是比較企業市值，如果現時的市值好低，例如$5億，低過$8億，反映佢在資產的層面，已處於平的水平。
當然，我地在分析時，應該同時考慮佢的業務價值。
------------------------------------------------
Q48384：
想請問一下老師，如果要找尋潛力優質股，可以從財務報表哪幾個方面看出來？還是有其他方法
龔成老師：
財務報表是其中一個方法，我地選股時，會用好多方法去選股，因為無一個方法是完美的，不同方法如同不同角度去尋找出優質、潛力股。
所以我在課堂中，會教5種選股方法。
另外，我課堂研究在一些財務指標，研究過往10年升10倍的股票，發展有一個財務指標，明顯比一般企業高的。課堂會有講述。
------------------------------------------------
Q48385：
阿Sir，我係你學生，好奇一問，點解你唔出樣呀，又唔係唔靚仔（八卦咋）
龔成老師：
第一，因為我唔中意比無聊人知我真樣，你上過我堂，當我是老師，當我是朋友，比你見真樣，無問題，但網上好多人，唔會尊重你，甚至只會攻擊你，這些人，我唔覺得佢有資格見我真樣。
第二，我好多朋友都唔知我就係龔成，而我都唔想太多人知。
因為當佢知道你認投資股票時，就會成日煩你，問你貼士，而股票總有賺蝕，所以好煩。
------------------------------------------------
Q48386：
老師，我近排因為短炒輸咗10幾萬
我唔知點算好。睇詳書增加知識？
龔成老師：
你可首先睇：
《圖解股票小百科》
《80後千萬富翁》
《股票勝經》
之後再睇其他。
你睇完就會明之前點解輸錢，因為短炒從來都唔會賺錢，只是無知散戶先會做的事。
------------------------------------------------
Q48387：
龔成老師，我想問一下，每月是不是一定要月供？還是可以儲錢，等大市低於水平，再入貨？
因為有時候可能月供會將平均買入價拉高了？
謝謝！
龔成老師：
最好是保持月供，每月進行，因為這可以減少人為主觀的因素，程式化般不斷去入。
當然，你自己如果現金不多，或分析到現時大市唔平，都可以停現金，自己儲錢，等機會先入。無絕對的答案。
但一般來說，只要不是太貴，都會保持月供，這刻雖然好低拉高，但如果是優質股，長遠不斷增長，都是值得的。
------------------------------------------------
Q48388：
2326買得？有人介紹
龔成老師：
新源萬恒控股（2326）主要從事採購及銷售金屬礦物及相關工業原料、生產及銷售工業用產品，以及生產及銷售公用產品。
生意不斷向下，毛利率持續減少，反映賺錢能力正不斷減少，過往盈利不穩，近年更出現虧損，投資價值低，不建議投資。
------------------------------------------------
Q48389：
問想隻美股，Crowdstrike，買少少可以？
龔成老師：
Crowdstrike Holdings Inc (CRWD)是位於美國加利福尼亞州的電腦安全技術公司。
集團平台提供包括防病毒、端點檢測和響應（EDR）、設備控制、託管威脅搜尋、信息技術（IT）衛生、漏洞管理等業務。
近數年集團營業額，按年都近乎倍增。不過，收支依然未達至平衡，尚在虧損狀況。不過，已有出現收窄跡象。
此股都有投資價值，但未知幾時先有穏定盈利，故不確定性偏高。加上，行業內競爭激烈，未來發展面對挑戰不少，你投資係可以，但只宜小注。
------------------------------------------------
Q48390：
老師，想告訴你一個好消息！我媽媽之前成日炒炒賣賣，之前我不斷叫佢跟你既方法。佢終於在幾個月前建立左收息，同平穩組合。佢今日同我講，佢好多謝你
佢個portfolio 都因為夠平衡，所以呢幾日升左好多
龔成老師：
太好了！
記住，我地是「配置」，同時這是長期過程，唔好太在意短期股價。方向已正確，集中收息就得。
------------------------------------------------
Q48391：
老師你好多謝你！我係你股票班學生，幾年前見你介紹隻DELL，話佢商業模式好勁，我買入少少，而家升左幾倍，想問賣唔賣好。
龔成老師：
戴爾電腦 Dell Technologies Inc.（DELL）是一家廣泛的信息技術供應商，主要為企業提供硬件。
它專注於高端個人電腦和企業內部數據中心硬件。它在個人電腦、外圍顯示器、主流服務器和外部存儲等核心市場上的份額位居前三。
戴爾是垂直整合的，但有一個強大的組件和組裝合作夥伴生態係統，也嚴重依賴渠道合作夥伴來完成其銷售。
佢業務有平穩增長能力，生意不差，保持穩定增長，但就不是高增長類。雖然現價未算明顯貴，但短期有機會波動。
你可考慮減一半，留一半。
------------------------------------------------
Q48392：
請問買黃金定紙黃金好？
龔成老師：
如果較方便，可以買紙黃金、金ETF，如果買實貨，由於無咁靈活及差價較闊，因此，一般都會以長線/超長線為主。
------------------------------------------------
Q48393：
Sir现在03416可以入手吗
龔成L老師：
ＧＸ國指備兌（3416），之投資目標為透過投資於恒生中國企業指數的成份股本證券，及沽出相關指數的認購期權以收取認購期權買方支付的款項（期權金），以產生收入。
這ETF並不是傳統型的ETF，因此情況會較特別，優點是高息，往往有10%以上的利息，因為利用期權去產生現金流，但缺點是背後都有一定風險。
簡單來說，在一般的市況，這ETF可以派不差的股息，但這類ETF，有3個風險：
1）如果股市持續向下，ETF價格都會大跌，有機會出現賺息蝕價的情況。
2）當股市大升，這ETF的升幅有機會落後大市，只能賺到利息收入，而錯失了增值時期。
3）操作風險。因為基金無完全講當中的運作，我只能透過基金網站簡單講述的操作，去估當中的運作，如果基金操作不當，會否有資產價格大跌的風險，這點我都不清楚。
我並不是說不能投資這ETF，而是要明白上述的風險，同時在注碼上不宜過多。
------------------------------------------------
Q48394：
見你好耐之前已叫人月供VOO，其實咩泥？
龔成老師：
Vanguard S&P 500 ETF（VOO）就是追蹤美股的ETF，追蹤指數是標普500指數，當中都是全球有實力的公司，有長線投資價值。
由於美股波動，不建議一次過大手買入，最好的方法慢慢分注，或以類似月供模式進行，長線持有，這是一個最好的投資策略。
------------------------------------------------
Q48395：
如果有定期危疾，喺唔喺買 定期 最好？
龔成老師︰
定期是指"保費全期不變"??
其實，危疾一般個保費，都係按你買時架"下一個生日年齡"計，之後一直按這個保費供。
唔似醫保咁，年年會(因年紀)上調保費。
所以，你焦點都係放翻落"保障範疇"部份，去睇去適唔適合你。
------------------------------------------------
Q48396：
3466 6823 邊隻會好啲
龔成老師︰
從組合平衡性角度，3466較好，因為佢係一籃子收息股，而唔係個股。
當3466ETF裡面個別股票表現欠佳，也不會對成隻ETF造成重大影響。
恒生高息股30指數ETF（3466）是一隻指數追蹤基金，其旨在盡實際可能取得（未計費用和開支前）接近恒生高息股30指數的價格回報表現。
此基金其一個特色，是香港上市股票通常會每季或每半年派息一次，而恒生高息股30指數ETF旨在每月派息。
不過，大家要記住，選擇收息股最重要係質素，唔係一年派幾多次息。如果你係要每月收息，其實將全年股息集埋，自己再分配成12份就可以。
至於此ETF，主要係投資於金融類股份，佔接近4成，其次是佔約2成的地產建築業。
當中最大持股，包括中國飛鶴(6186)、電訊盈科(0008)、遠東宏信（3360）、恒隆地產（0101）等。這些股票都有質素，適合長線收息。
此股可作收息之用，現價合理，可分注儲貨。
------------------------------------------------
Q48397：
龔Sir，想了解下7709同7747點睇，已經高位持倉
龔成老師：
這些韓國企業不是投資價值，這些ETF始終有槓杆，加上韓股近期十分波動，你要考慮風險，由於這類槓杆ETF不宜長線投資（因為持有時間愈長，當中的成本就愈高），所以，你最好睇位上翻D減持。
其實在大方向上，我不建議持有這些槓杆。
南方東英SK海力士每日槓桿(2x)產品(7709)，投資目標是提供 SK海力士(韓交所：000660)每日表現的兩倍 (2x) 投資回報。
SK海力士(韓交所：000660)本身，是一家韓國半導體公司，全球第二大記憶體晶片供應商，主要產品包括DRAM和NAND 快閃記憶體。
此股有投資價值，不過佢係屬於潛力股，即係風險度高架股票，故會較波動，本身不宜大注。
而7709因為有槓桿，令佢本身已經高架風險，再進一步倍大，所以不太建議以此作為投資目標。若睇好，應選擇分注買無槓桿的正股。
ＸＬ二南三星（7747）之投資目標為追踪三星電子Samsung Electronics（韓國交易所：００５９３０）的普通股每日表現兩倍（２ｘ）的投資業績。
三星電子的核心業務主要分為兩大部門：裝置體驗 (Device eXperience, DX) 和 裝置解決方案 (Device Solutions, DS)，涵蓋了消費性電子產品和半導體元件製造。
近年的收入和盈利表現不差，在經歷了2023年的低谷後，公司在2024年至2025年實現一定的增長。
相信這股長遠發展都正面，但始終企業規模較大，加上中國等更多對手加入市場，令不確定增加。加上（7747）本身是槓杆，考慮到些因素，只建議小注投資，同時要明白當中的風險。
------------------------------------------------
Q48398：
想請教下點睇290國富量子，想現價買小小
龔成老師：
國富量子（0290）於2025年3月由改左名。最近的業務已轉向量子科技、數字資產、現實世界資產（RWA）及傳統金融服務的跨界整合。
雖然這些都是有發展力的業務，但始終企業新發展這類業務，不確定性會較大，你預險較高。最新業務：
1. 量子科技與智能數據
DeepSeek 智能數據業務：正式啟動了基於 DeepSeek 的智能數據一體機業務。
2. 真實世界資產 (RWA) 生態
RWA 閉環生態：集團致力於構建涵蓋「交易所 – RWA 投行 – Pre-RWA 基金 – RWA 二級市場基金 – 金融科技解決方案」的全生命周期生態系統。
3. 數字資產與加密貨幣
比特幣投資：集團曾通過出售比特幣實現約 694 萬港元的收益。
4. 傳統金融服務
公司繼續維持其在香港的金融牌照業務（包括 1、4、6、9 號牌）
雖然業務屬有發展類，但由於轉型後，股價上升很多，加上業務屬高風，也較新，所以不確定性好大。
除非你能承受高風險，否則，不太建議。
------------------------------------------------
Q48399：
你股票基礎班由零開始嗎？
完全0經驗的小白
因爲我請教過身邊不同的朋友，佢地都不約而同叫我如果想睇書就選擇你的書，證明你的確幫助同影響了好多人????????
龔成老師：
因為我十多年來，不停講理財、投資的重要性，教大家不要炒賣，要學知識，可能對佢地有點幫助。
上述課程適合初學者的，因為整個課程的設計都是針對初中階投資者的，課堂頭3堂都是初階的內容，只要你課後好好溫習，能跟到之後的內容。
每一課有兩份筆記比你，並有指引，要你在一星期內找那些資料，溫那些內容，做功課等。
每一堂更有一個附加的網上影片，是大約30分鐘的重點重溫片，可比你在家溫習。另外，每一堂都有簡單功課要你做，並有附加影片解說答案。
只要你跟著去完成，就能掌握整個課程所學。到你讀完後，你能自己選股、投資時機、配置、評估平貴，在投資上已掌握了一定的知識。
另外，你上課之前，多睇理財、股票類的書（例如睇《股票勝經》、《圖解股票小百科》這書），留意一下財經新聞，到時就較易跟到。
------------------------------------------------
Q48400：
龔sir，想問係咪有個存款保障計劃，買人民幣有無？
龔成老師︰
《存款保障計劃》是保障存戶存放於成員銀行香港辦事處的港元、人民幣和其他外幣的存款。現時每家成員銀行每位存款人的存款（包括本金及利息）最高可獲得80萬港元的保障。
受保障的存款包括：
✓各類常見存款戶口（如儲蓄戶口、往來帳戶及年期不多於五年的定期存款）
✓個人、聯名*及公司戶口的存款
✓用作抵押的存款
*聯名戶口持有人會被視爲於有關存款中佔有相等的份額。
不受保障的存款包括：
✗離岸存款（如存放於成員銀行在海外或内地辦事處的存款）
✗結構性存款（如外幣掛鈎及股票掛鈎存款）
✗不記名票據（如不記名存款證）
✗年期超過五年的定期存款
✗非存款類產品（如債券、股票、窩輪、互惠基金、單位信託基金、保險產品及虛擬資產）
✗儲值支付工具
除部份獲存款保障委員會豁免的銀行外，所有持牌銀行都屬於存款保障計劃成員，其中近幾年才出現的虛擬銀行，如ZA Bank、LIVI Bank、MOX Bank等，都屬於保障之列。
在存款保障計劃下，無論存戶在同一間銀行內擁有多少個存款戶口，每位存戶都只可獲最多80萬港元的補償。若果存戶是分散於不同銀行，例如分別存放在四間計劃成員帳戶內，存戶於每一間計劃成員都分別享有80萬港元的保障額。
***有關準則或不時更新，詳細情況請以官方網頁資訊為準。***
<<存款保障官方網站>>
https://www.dps.org.hk/index.html
<<存款保障賠償個案例子>>
https://www.dps.org.hk/tc/determination.html
<<計劃成員和獲豁免名單>>
https://www.dps.org.hk/tc/scheme.html
----------------------------------------------
若你有問題想向本人發問，可在龔成的fb專頁「www.facebook.com/80shing」inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。
另外，所有個案及意見，只是供大家參考，只是教學分享，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。
由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。